ການເລີ່ມຕົ້ນເຮັດທຸລະກິດ ຄືການເລີ່ມສ້າງຕົວທ່ານເອງ ໃຫ້ສຳເລັດ ແລະ ມີຊື່ສຽງ. ເປັນການເຮັດວຽກໃຫ້ຕົວເອງແລະເຮັດໃນສິ່ງທີ່ທ່ານສົນໃຈ. ໃນຖານະເປັນຜູ້ປະກອບການ, ເຂົາຈະມີຄວາມກັງວົນຫຼາຍກ່ຽວກັບແຜນການ, ແລະ ຕ້ອງໄດ້ຮັບການແກ້ໄຂບັນຫາໃນຂະນະທີ່ພວກເຂົາພົບພໍ້. ບໍ່ມີຫຍັງຮັບປະກັນ ຄວາມສໍາເລັດທາງທຸລະກິດ. ພວກເຮົາຕ່າງເປັນນັກສ່ຽງໂຊກ ທີ່ມີເປົ້າໝາຍເປັນເດີມພັນ.
ວິທີງ່າຍໆທີ່ຈະຫລີກລ້ຽງຄວາມຝັນສະຫຼາຍຂອງຜູ້ປະກອບການ ໃນຊ່ວງທຳອິດແມ່ນການລະມັດລະວັງເປັນພິເສດເລື່ອງຫຼຸດຜ່ອນຄວາມສ່ຽງໃດໆຕໍ່ທຸລະກິດຂອງທ່ານ. ທຸລະກິດມີຄວາມສ່ຽງໂດຍທຳມະຊາດ. ການຮູ້ວິທີຈັດການກັບມັນ, ກໍ່ຈະສາມາດຫຼຸດຜ່ອນຄວາມສ່ຽງ:
ທຸກຄົນສາມາດສຳເລັດໄດ້ ແຕ່ບໍ່ແມ່ນທຸກໆຄົນຈະສຳເລັດ
ແຜນຕ້ອງມາກ່ອນ
ການບໍ່ວາງແຜນແມ່ນການວາງແຜນຈະລົ້ມເຫລວ. ການວາງແຜນດຳເນີນງານ ບໍ່ຊັດເຈນຫຼາຍເທົ່າໃດ, ກໍ່ຈະເຮັດໃຫ້ການດຳເນີນທຸລະກິດບໍ່ຊັດເຈນ ແລະ ເຮັດໃຫ້ທ່ານລົ້ມລົງໃນພາຍຫຼັງ. ຫຼື ຈະເວົ້າອີກຢ່າງໜຶ່ງຄື ການບໍ່ມີແຜນ ແມ່ນການກຽມແຜນການແບບຕັ້ງໃຈ ທີ່ຈະຈົບທຸລະກິດແບບສິ້ນຫວັງ. ຖ້າທ່ານໄດ້ຄິດຢ່າງຈິງຈັງໃນການເລີ່ມຕົ້ນເຮັດທຸລະກິດ, ທ່ານຕ້ອງແນ່ນອນວ່າທ່ານໄດ້ເຮັດວຽກກ່ຽວກັບ ແຜນທຸລະກິດແລ້ວ. ເມື່ອທ່ານພ້ອມທີ່ຈະເປີດທຸລະກິດແທ້ໆ, ຈົ່ງປະຕິບັດແຜນການທີ່ວາງໄວ້ໃຫ້ຫຼາຍ ເພື່ອວ່າມັນຈະລວມເອົາລາຍລະອຽດທີ່ລະອຽດ, ຂໍ້ມູນສະເພາະ, ກຳນົດເວລາແລະການຄາດຄະເນ ເພື່ອໃຫ້ສາມາດກວດສອບໄດ້ວ່າ ມັນມີທິດທາງດີຄືທີ່ເຮົາຄິດບໍ່? ຖ້າທຸລະກິດຂອງທ່ານໄດ້ເປີດຕົວມາແລ້ວ, ປະກອບແຜນທຸລະກິດທີ່ມີຍຸດທະສາດຮອບດ້ານໃນແຕ່ລະປີ, ແລະ ຈາກນັ້ນຕິດຕາມການປະເມີນເບິ່ງສະພາບຕົວຈິງ.
ຮ່ວມງານກັບຜູ້ຊ່ຽວຊານ
ຄວນເຮັດວຽກ ກັບມືອາຊີບ ຫຼື ຄົນມີປະສົບການ. ອີງຕາມຜູ້ຊ່ຽວຊານດ້ານຊັບພະຍາກອນມະນຸດ ໄດ້ຄາດຄະເນວ່າ: ຜູ້ທີ່ມີຄວາມຊ່ຽວຊານໃນດ້ານວິຊາຊີບໃດໜຶ່ງ, ເຮັດວຽກແບບມືອາຊີບ ແລະ ຊ່ວຍລົດຄວາມສ່ຽງ. ໃນແຜນຍຸດທະສາດໄລຍະຍາວຂອງທຸລະກິດ, ໜ້າວຽກກວດສອບນີ້ ໂດຍການເຮັດວຽກກັບຜູ້ກວດສອບພາຍໃນທີ່ສາມາດປະເມີນຄວາມສ່ຽງ ສຳລັບບໍລິສັດຂອງທ່ານ. ນອກເໜືອຈາກການປະເມີນປັດໃຈຄວາມສ່ຽງ, ຜູ້ກວດສອບພາຍໃນສາມາດຊ່ວຍຮັບປະກັນຂະບວນການປະຕິບັດງານແລະລະບຽບການ, ຊ່ວຍຄັດສັນໃນການຈັດລຽງລຳດັບຄວາມສ່ຽງທີ່ມີປະສິດຕິຜົນ ແລະ ຍົກລະດັບຄວາມສຳເລັດຂອງການຕອບຮັບຕໍ່ຄວາມສ່ຽງທີ່ເກີດຂື້ນ ແລະ ສົ່ງຜົນກະທົບທາງລົບ. ຖ້າທ່ານຕ້ອງສູ້ກັບບັນຫາດ້ານການເງິນໃນການດຳເນີນທຸລະກິດ, ຢ່າຊອກຫາແຕ່ຊຽວຊານຜູ້ດຽວ. ຈ້າງມືອາຊີບຜູ້ທີ່ສາມາດເຮັດໃຫ້ທ່ານມີການປັບປຸງທີ່ຖືກຕ້ອງກ່ຽວກັບບ່ອນທີ່ບໍລິສັດຕ້ອງການບັນລຸ, ແລະເຕືອນທ່ານກ່ຽວກັບຄວາມສ່ຽງໃດໆໃນອະນາຄົດໂດຍອີງໃສ່ແນວໂນ້ມຂອງຕະຫຼາດ, ປັດໃຈດ້ານເສດຖະກິດ, ຫຼືການໃຊ້ຈ່າຍຂອງບໍລິສັດ.
ແກ້ຈຸດອ່ອນ
ໃນບັນດາບໍລິສັດທີ່ປະສົບຜົນສຳເລັດທີ່ສຸດ, ແມ່ນບອກຜົນການເຮັດວຽກຂອງຄົນທັງບໍລິສັດ. ເຮົາບໍ່ຮູ້ໄດ້ວ່າໃຜປະກອບສ່ວນກຳໄລທໍ່ໃດ ແຕ່ການທີ່ເຮັດວຽກ ແລະ ມີການກວດສອບວຽກຮັບຜິດຊອບຂອງແຕ່ລະຄົນ ຕາມໜ້າທີ່ທີ່ມອບໝາຍ ດ້ວຍການລົດຄວາມສ່ຽງໃນລະດັບບຸກຄົນ ມັນຈະຊ່ວຍເຮັດໃຫ້ສ່ວນລວມມີຜົນດີ. ການແກ້ໄຂຈຸດອ່ອນ ຕ້ອງເລີ່ມມາຈາກບຸກຄົນກ່ອນອື່ນໝົດ. ຈຸດອ່ອນເຫຼົ່ານີ້ຄວນຖືກປະເມີນແລະແກ້ໄຂ, ແຕ່ຢ່າລືມກ່ຽວກັບຈຸດແຂງຂອງແຕ່ລະຄົນ. ເພີ່ມຂີດຄວາມສາມາດ ໃນດ້ານດີໃຫ້ກາຍເປັນ ກຳລັງສູງທີ່ສຸດເພື່ອວ່າທ່ານຈະບໍ່ປ່ອຍໃຫ້ບໍລິສັດມີຄວາມສ່ຽງ.
ທຸລະກິດແມ່ນທຸລະກິດ
ການກາຍເປັນຄົນທີ່ມີຄວາມຮູ້ສຶກຫລາຍເກີນໄປໃນໂຄງການ ອາດເຮັດໃຫ້ການຕັດສິນໃຈ ມີຄວາມຜິດ ພາດ. ຕັ້ງໃຈແນໃສ່ ແລະ ເກັບກຳຄວາມກ້າວໜ້າຂອງທ່ານໄປສູ່ເປົ້າໝາຍ. ການຊອກຄົ້ນຫາແລະຕອບໂຕ້ກ່ອນເວລາອັນຄວນແມ່ນສິ່ງທີ່ ຈຳເປັນໃນການ ຕັດທຸລະກິດທີ່ມີຄວາມສ່ຽງ. ມັນບໍ່ແມ່ນແນວອັບອາຍ ຫາກຮັບຮູ້ວ່າຄວາມສ່ຽງທີ່ມີ ບໍ່ສາມາດຂ້າມຜ່ານໄດ້. ການຍອມຮັບປິດກິດຈະການ ຈະລົດຄວາມສ່ຽງໃນການສູນເສຍຍິ່ງໃຫຍ່. ມີຫຼາຍບໍລິສັດຕ້ອງປິດຕົວ ໃນເມື່ອເວລາຜ່ານໄປ. ເຊັ່ນ: ຝີມຖ່າຍພາບ.
ຮູ້ເວລາທີ່ຈະຕັດການສູນເສຍຂອງທ່ານ
ກຳນົດຂອບເຂດ ຂອງໄລຍະທີ່ທ່ານເຕັມໃຈຈະຂະຫຍາຍຊັບສິນທາງທຸລະກິດ ແລະ ການລົງທືນສ່ວນຕົວຂອງທ່ານ. ບັນທຶກຂໍ້ມູນນີ້ ແລະຫຼັງຈາກນັ້ນມຸ່ງໝັ້ນທີ່ຈະຍຶດໝັ້ນມັນໃນການດຳເນີນງານ. ຖ້າທ່ານພົບວ່າຕົວທ່ານເອງຕ້ອງການທີ່ຈະພັກດັນວຽກງານເພີ່ມ, ໃຫ້ປຶກສາຫາລືທາງເລືອກຂອງທ່ານ ແລະ ໃຫ້ຄວາມສ່ຽງຂອງທ່ານຖືກປະເມີນໂດຍຜູ້ຊ່ຽວຊານກ່ອນທີ່ຈະຕັດສິນໃຈ. ທຸລະກິດຫຼາຍແຫ່ງມີບັນຫາໃນເວລາທີ່ພວກເຂົາບໍ່ເບິ່ງຕົວຈິງດ້ານ ງົບປະມານ, ແຜນການທີ່ວາງໄວ້, ແລະ ມາດຕະຖານອື່ນໆທີ່ໄດ້ຕັດສິນໃຈມາກ່ອນ. ບາງຄັ້ງທ່ານຕ້ອງເບິ່ງອອກນອກແຜນ ແຕ່ທ່ານຕ້ອງຍຶດໝັ້ນຂອບເຂດ ແລະ ຮູ້ເວລາທີ່ຈະຕັດການສູນເສຍຂອງທ່ານເພື່ອຈະຊ່ວຍປະຢັດທຸລະກິດຂອງທ່ານ.
ຜົນສຳເລັດຂອງທຸລະກິດຂອງທ່ານແມ່ນຂື້ນກັບທ່ານ. ນິໄສການເຮັດທຸລະກິດທີ່ແນໃສ່ຫຼຸດຜ່ອນຄວາມສ່ຽງສາມາດເດີນໄປສູ່ຄວາມສຳເລັດຂອງທ່ານໄດ້ຢ່າງຍາວນານແລະມີຄ່າຄວນທີ່ຈະລົງທືນເວລາ. ການວາງແຜນ, ການກວດສອບ, ເອກະສານ, ໃຫ້ຄຳໝັ້ນສັນຍາ ສິ່ງນີ້ຈະຊ່ວຍພາທ່ານປະສົບຜົນສຳເລັດ!
ທ່ານມີຄຳແນະນຳໃດຕື່ມອີກບໍ່ໃນຫົວຂໍ້ນີ້ ຫຼື ມີປະສົບການທີ່ແຕກຕ່າງຈາກນີ້, ຊ່ວຍແບ່ງປັນປະສົບການນັ້ນໃນທີ່ນີ້ດ້ວຍ ເພື່ອເປັນການໃຫ້ຄົນອື່ນໄດ້ຮຽນຮູ້ນຳກັນ.
